من النهارده قول لأ
انسى الناس و عيشها بحق
و قولها كده بصوت عالى
أنا هبقى إنسان تانى
آه مش مغرور و لا أنانى
بس هيعيش الدنيا صح
مش هيمشى جنب الحيط
و هيخرج خلاص بره البيت
و هيقول ولو صوته اتبح
أنا اللى ماشى هنا صح
هيمشى فى وسط الشارع
و لو مين قدامى ممانع
لأنى إنسان عايش حر
مش مستنى كلمة حد
و لا خايف من أى سد
كفاية علينا استسلام
كفاية سكون و خضوع
مش هنرضى بأى كلام
و نخاف لأنه ممنوع
كفاية نسكت على الغلط
و نقول مسكين مقصدش
بيهزر أو حتى ما يعرفش
لأ ده معاك مابيهزرش
ده بيوصلك رسالة
حتى لو كانت مش متقالة
النهاردة أنت اللى سكت
بكرة من الكلام هتتمنع
وبسهولة كده هتتظلم
حتى لو قلت أنك زهئت
و من الظلم خلاص تعبت
لأن صوتك هيخرج مكتوم
ماهو صوت واحد مظلوم
فمنهاردة خليك مع دماغك
وامشى دايما ورا اختيارتك
حتى لو دقت من ده المر
بس فى الآخر هتفضل حر
هناك 14 تعليقًا:
هنقول لا
على ايه ولا ايه
على عمرنا اللى عدى من غير ما نعرف فى ايه
على حقنا اللى ضايع
على ايه ولا ايه
هنحاول صحيح نقولها
بس نقدر يوم نقولها
ونقولها
صح
من انهارده هاقول اه
على كل شيئ للسعادة
على كل فرصة للحياة
على حب الخير و كل الجمال
على حب ايام لن تصل للكمال
من انهارده هاقول اه
فاقبل حياتك يا انسان
اقبل حتى ضغط الزمان
فحياتك تمضى فى ثوان معدودة
فعشها بالايمان و الطاعة
صراحة البوست حلو اوى و جميل و هنحاو نستعمل كلمة لأ فى موضعها
و تقبلى تحياتى
البوست حلو جدا
ياريت كل واحد يطبقه على حياته الشخصية
نصلح بقى من نفسنا وكفايه سلبيه
بهنيكى على البوست الرائع
romancy
حلو أوى ردك..يا سلام عليك بترد بشعر..و فعلا هانقول لأ على أيه و لا أيه...عندك حق..
ضحكات الحياة
باضم صوتى لصوتك..و طبعا هاقول آه للسعادة و كل فرصة للحياة..بس ليه نقبل حتى ضغط الزمان؟..الأحسن أننا نحاول نصلح أحوالنا..
شكرا جدا على ردك المطول و الممتع..
تحياتى
فراشة
منورانى دايما فى المدونة..و سعيدة باتفاقك معى فى الرأى...
تحياتى
بوست هايل جدا
والله بجد برافوا عليكى
والأهم طبعا منقولشى لأه على كل حاجه ونبقى يا اما ساكتين يا اما بنقول لأه وخلاص .
بس بجد عجبنى اوى الكلمات وفيه معانى كتير حلوه
البوست اكتر من جميل
واكتر من هايل
تحياتى
السلام عليكم
أسعدنى مرورك الكريم لمدونتى
وأشكرك
وبصراحه البوست جميل وبصى من غير ما توضحى ده مدونتك وده إحساسك أعملى اللى يريحك
ههههه
وعلى فكره نزلت بوست جديد أتمنا أن تزوريه
وإن شاء الله بينا تواصل
تقبلى تحياتى
محمود نشأت
ميرسى جدا على كلامك و أكيد انا مقصدش اننا نقول لأ على كل حاجة...بس على الحاجة اللى تستحق..
دايما منور المدونة..
اسلام ديو
شكرا لمرورك و تعليقك..
عاشقة الأحزان..
نورت المدونة وإن شاء الله يبقى بينا تواصل..ميرسى جدا على ذوقك و ردك الجميل..
أنا آسفة بجد على التأخير فى الرد و فى زيارة المدونات..بس بجد بجد الامتحنات مش راحمانى..
إرسال تعليق