السبت، 17 أكتوبر 2009

أول انترفيو فى حياتى









أول حاجة انا عايزة أكتب اعتذار كبير بالخط العريض لأنى كنت بعيد شوية الأيام اللى فاتت..بس تقريبا دى حالة طبيعية مع دخول الكلية...أول ماتدخل تحس أنك اتشليت من الصدمة..فاطبعا ماكنتش قادرة أكتب حاجة خالص...و بعد مرور أسبوعين من البهدلة و الطلوع و النزول و الخناق فى المواصلات و متعة و قفة المعامل و حر المعامل و خنقة المعامل قررت أنى أكتب تانى ...و بما إن مفيش إلهام خاااالص خاالص فأنا قررت أحكيلكوا عن حكاية لطيفة ...حكاية انترفيو يارب تعجبكو...
كان يا مكان فى سالف العصر و الأوان لما دخلت كلية صيدلة قعدت أدور على حاجة ترفيهية فيها و أدور و أدور...و طبعا ما لقيتش...كان فى حاجة كده تعتبر من نوع من أنواع النشاط...أيه ده شايفة الناس هتفهمنى غلط...نشاط علمى طبعا..بس فيه شوية حركة بتخرج بره الكلية و تروح شركات و صيدليات و كده يعنى ..فكان يعتبر حاجة فظيعة!!..قالولى قدمى قلت ماشى..بس راحة أقدم أنا فى أمانة الله ألاقيلكو أيه...النشاط بيدٌخل بانترفيو...يا نهار أسود...و طبعا قلتلهم لأ أنا مش وش انترفيوهات خالص...بس الزن على الودان وحش...قاعدوا يقنعونى لغاية لما قررت أدخل العملية الفدائية دى"النترفيو"..
و فعلا مرت الأيام و جه اليوم الموعود...طبعا كان يوم معامل.."يعنى يوم البهدلة العالمى" و اليوم ده أنا بابقى بحلم بالبيت من و انا لسه فيه...المهم اضطريت آسفة أنى أقعد بعد المعامل عشان الانترفيو..و طبعا أنا قبل ما أدخل كنت عاملة بحث شامل عن الأسئلة الى بيسئلوها...برده الاحتياط واجب...
قبل ما أقول لكم عن اللى اتقال فى الانترفيو لازم تعرفوا إن اللى كان بيعملهولى كان طالب زى...آه والله..شفتوا الجمال..كلية آخر تطور...أصل احنا الطلبة أسرة مع بعضينا-على رأى الفيلم- منحبش ندخل حد غريب بينا..

وبدأ الانترفيو
أول حاجة قالى عرفى نفسك..و طبعا أنا محدش قالى السؤال ده قبل كده..فابدأت أقوله اسمى و سنى و ساكنة فين
فاعتقد أنه بدأ يحس أنى عاملة زى الخاطبة اللى بتقول مواصفات العروسة فماسبنيش أكمل و قالى أنت مش شايفة إن شغلانة مندوب الأدوية مش كويسة للبنات؟...أنا قلت له لأ طبعا كويسة..بس للأسف مردتش أكتر من كده و مش عارفة ليه...يمكن لأنى حسيته بيسأل سؤال عبيط....عامة أنا الاحساس ده كان عندى طول الانترفيو....أصل لما كلية يبقى 80% فيها بنات يبقى ميبفعش خالص تقول الشغلانة دى تنفع و لا متنفعش..غير إن البنات مش ناقصين أيد و لا رجل..إذن فسؤاله كان بالنسبة لى منتهى العبط....
و بعدين رجع لى تانى و قالى قولى لى 3 مميزات فيكى و 3 عيوب..............أوباااااا...أهو ده اللى أنا كنت خايفة منه...طبعا أنا الناس قالولى إن السؤال ده أساسى فى كل انترفيو فأنا حاولت أحضر الاجابة و أسأل اللى يعرفونى و كده...و طبعا قعدت أحاول أقنعه إن المفروض الناس هى اللى ترد على السؤال ده مش أنا...بس لا حياة لمن تنادى...يقولى أصل أنا لما أعرف عيوبى هاصلحها...يا سلااااام ماكنش حد غلب...قلت له طب أيه عيوبك أنت قال لى هاقلك بعد الانترفيو..أيه هاقلك بعد الانترفيو دى...ماتقلها بصراحة...أنا مش عارف عادى يعنى..المهم بعد فشلى من الهروب من السؤال اضطريت آسفة إن أجاوب قلت له
المميزات :
1-helpful 2-responsible 3-مش فاكرة قلت أيه بصراحة
العيوب بأه:
1-عنيدة 2-عالطول عايزة أكتر...قالى ده مش عيب دى ميزة...طب بذمتك ده كلام يعنى أنا يطلع عينى عقبال ما أفكر هافوله أيه ...و بعدين يقولى ده ميزة ...طب أجبله عيب منين دلوقتى...و معرفتش أقول أيه فى التالت...هو فى عيوب طبعا بس ما ينفعش أقولها...يعنى ممكن أقول إنى بازعل بسرعة...هيقول لى طيب مع السلامة فوتى علينا بكرة...لأن دى أول صفة المفروض ماتبقاش موجودة...
يعنى هو مثلا كان بيحاول يستفزتى طول النترفيو عشان يشوف هتأثر و لا لأ...بس على ميين...أبقى بجاوب..يقاطعنى و يسأل سؤال تانى و ميبوصليش أصلا و أنا بتكلم و بعدين يقلى أنت اتضايقتى و يا ويلك لو قلتى آه...و طبعا ده بيتعمل فى كل الناس عشان يشوفوا مين اللى هيصمد و مين اللى هيخلع على أساس إن الدكاترة هتلر و لا هلاكو...ماعلينا....
نرجع للانترفيو.....الجزء المهم جدا جدا و الشيق و المسلى...قياس الذكاء..أن أن آه....أول حاجة قالى قولى لى 10 استخدامات للمسمار غير إن أننا بنثيت الحاجات بيه...فى 40 ثانية...طبعا مش قادرة أقولكم احساسى كان أيه...بالظبط زى مايكون حد سألك اسمك أيه بالصينى...تلاقى نفسك وقفت و بلمت بالرغم إن اسمك واحد بكل اللغات...قلت له بنحفر بيه ونعمل بيه
&art work و كام حاجة عبيطة كده تانية بس طبعا ماكملتش 10 و لا حتى 5
و طبعا أول ما خرجت من باب الكلية افتكرت اكتر من 10 كمان إن احنا ممكن نعور بيه و ممكن بما إنه حديد نستخدمه كل استخدمات الحديد...نجربه مع مغنطيس .....و نفهم منه عملية الصدأ...و أى كلام من الكلام الفارغ ده...لكن ساعتها مخى وقف....
ندخل على السؤال اللى وراه و هو لو مليتى بانيو على الآخر أيه أسرع طريقة تفضيه بيها...بالجردل و الشفشق و لا المعلقة....طبعا أنا قاعدت أسأله مليت أيه؟...يقولى بانيو...اقوله لأ تانى مليت أيه....يقولى بانيو...و بعدين قررت أصدق إنى اللى سمعاه ده صح....قلت له الجردل و أنا مقتنعة أنه غلط لأن مش معقول السؤال بيقى بالسهولة دى بس هو اللى ادالى 3 اختيارات بس............و طبعا كما توقعت طلعت اجابة غلك لأن المفروض أقول شيل السداداة....تهريج صح؟؟
و بعبدين ورالى سؤال بالأرقام بس الحمد لله أنا كنت عارفاه فقلت له أنى شوفته قبل كده فبدل ما يقولى برافو على أمانتك قالى أنت كنت هتجاوبى و لا أيه....أيه الناس دى....
و بعدين المرحلة المهمة ...مرحلة الاقناع و البيع...قالى بيعى لى التليفون ده_قصده تليفونه_و بسرعة كده رص لى اللميزات و طبعا ملحقتش أحفظ حاجة فاقلتله هابعلك تليفونى...و الصراحة هو وافق...أصل هابعلوا تليفونه السامسونج ده ازاى و أنا عمرى ما شيلت تليفون سامسونج........بس قعدت أحكيله على تليفونى قالى أنت مش شايفة أن نوكيا انتشرت و إنى الأحسن أجيب تليفون مش منتشر...طبعا الرد المناسب كنت إنى أقوله"نعم يا بابا...روح ألعب بعيد"...[س طبعا أنا فضلت ذوق لآخر لحظة و قلت له لأ طبعا لأن الأحسن إنك تجيب تليفون قطع غياره موجودة و منتشرة عشان متدوخش عليه و غير أن سامسونج مش unique
و لا حاجة ...و موجود برده..فى انترفيوهات تانية قالوا للناس بيعى لى نفسك...بجد الناس دى اتجننت...فالحمد لله أنها جت على قد موبايلات...و فى انترفيوهات تانية كانوا بقولوا اقنعينى بالتدخين..طبعا أنا لما دخلت الانترفيو قلت له أنا سمعت السؤال ده قبل كده...و برده مقدرش الصراحة دى.........
فى الآخر بقى قالى تدى لنفسك كام قلت له 90%...قالى أنت مغرورة..قلت له لأ........بذمتكم 90 % كتير دى مدخلش صيدلةحتى...نسيت أقولكم أنه فى أسئلة الذكاء سأل سؤال كمان و الحمد لله جوبته صح و كان مستغرب أوى و قعد يقولى أنت سمعتيه قبل كده...بنى آدم غريب فعلا...ليه مايبفكرش أن مخى يكون عود نفسه على نوعية أسئلة الغباء دى...عفوا الذكاء و بدأ يجاوب صح....المهم السؤال هو ازاى الواحد يغرق فى شبر مياه؟؟؟؟فانا قلت له يجيب كوباية و يلزقها على وشه بحيس أنه ميعرفش يتنفس و بكد يكون غرق فى شبر مياه...شوفتوا العبقرية.............
آخر حاجة..المرة د بجد...الولد عاوز يورينى أنه لغات و بتاع فقال لى....

Do u think I am gonna accept u?
و بيكلم بالامريكانى فاكر نفسه توم كروز...ما علينا....قلتله طبعا yes
و كان ناقص أقوله و رجلك فوق رقبتك...و طبعا مادخلتش النشاط ده..غير لأنى لبخت جامد فى الأسئلة و خاصة بتاعة الغباء د كمان لأنى ماكنتش فاهمه الموضوع عن أيه أوى فعكيت شوية...فهو فهم إنى مش واثقة من نفسى لما كنت بقله على حاجات مش هينفع أعملها...لأنى كنت فاكرة كبراة الكلية هم اللى بيعملوها...و بعيدن بعد ما خلصت الانترفيو اكتشفت أنها حاجات عبيطة و كل الطلبه هما اللى بيعملوها...................أيه رأيكم بقى..................و تفتكروا أدخلوه مرة تانية و لا أنفض.........يارب ما كنش طولت عليكم....

هناك 53 تعليقًا:

♥نبع الغرام♥♪≈ يقول...

مممممممممممممممم

ونقول اول تعليق

انا هنا

♥نبع الغرام♥♪≈ يقول...

حمد الله على السلامه

وحشتينى قووى
ياريت مش تغيبى تانى عننا

♥نبع الغرام♥♪≈ يقول...

ارو اقرء وارجع

فاصل صغنون ثم نواصل

♥نبع الغرام♥♪≈ يقول...

هههههههههههه

ايه يا روزى الحاجات الجامده دى
تعرفى بجد انك دمك زى العسل

وحبيتك قووى اكتر من الاول

ههههههههههههه
فيكى خفة دم رهيبه
ربنا يكرمك خير يارب ويوفقك
بس بجد مسليه
وادخلى تانى وسيبها على اللى خلقها

دمتى فى حفظ الرحمن

♥نبع الغرام♥♪≈ يقول...

لو احتجتينى فى المقابله التانيه انا هنا ماشى
اعرف اوجهم كويس

هههههههههههههههههه

عاشق الجنة من الإخوان صلى على النبى يقول...

رغم إن الموضوع طويل شويتين بس بصراحة
أنا شخصياً استفدت جداً لما قريته
وكمان انت شديت علي الولد ده قوي بالراحة شوية الرحمة حلوة ولا ايه
موضوع جميل جزاكم الله خيراً
في انتظار تشريفكم بالزيارة لمدونتي
صلي علي النبي

------ يقول...

وسسسسسسسسسسسسسسسسععععععععععع

والتعليييييييييييييق التالت

ازيك يامنة

وحشااانى والله

------ يقول...

هههههه

وربنا انتى زى العسل والله

ايه دا

بس اقول لو انت حاباها ادخلى تانى

وجربى حظك يمكن تصيب

بس اهم حاجة تكونى اتعلمتى من المرة الاولى

بس ياخوفى ليكونوا حاطوكى فى البلاك ليس بس

لا تـــشـــتــــاق يقول...

انتر فيو غلس اوى من شخص اغلس
ايه ده
عموما حمدلله على السلامه ونصيحه بلاش انتر فيوهات دلوقتى لحد ماالمدارك تتوسع في الغباء عشان تقدري توصلي للناس
هههههههههه
حاجه غبيه والله

زهور الامل يقول...

ههههههههههه اول انترفيو واتعقدتي كدة

ده انا المفروض يدوني جايزة نوبل على الانترفيوهات الفاشلة اللي عملتها في حياتي
ده انا عملت بعدد شعر راسي انترفيوهات

حسسوني اني اغبى مخلوقة في العالم واني متعلمتش اصلا
تعيشي وتعملى انترفيوهات
بس تكون انترفيوهات ناجحة يا قمر

اه من الحق
حمدالله على السلامة وعودا حميدا

المسلم الصغير يقول...

السلام عليكم ...
أزيك يا جميل ويا ترى عاملة أية بعد اول انترفيو حاسة ان انتي اتحطيتي في موفق جديد ومع نفس الوقت خطوة جديدة
هي بس علشان اول مرة فكنتى مرتبكة شوية بس أنتي مسبتهوش في حالة واتلمضتي معاه
ياريت تكوني أستفتي منها واوعي تخافي جربي مرة واتنين وتلاتة كمان ومتيأسيش
دومتي بخير

micheal يقول...

ههههههههههههههههههههههههههههههههههههههههههههههههههه
نترفيو
ههههههههههههههههههههههههه
انتي حتقطعي عليا ولا ايه
بخصوص الأسئلة اللي اتساليتها
لازم تشوفي البوست ده عشان تعرفي أننا ناس خبرة
http://strugglingmichealitoo.blogspot.com/2009/05/blog-post_09.html
بالتوفيق وبإذن الله يبقى حظك أحسن مني
:))
تحياتي

Rosie يقول...

بجد تعليقاتكم أكتر من رائعة...فرحتونى و ضحكتونى من قلبى...أرد بقى على واحد واحد...

Rosie يقول...

عاشقة الأحزان
دايما فى الأول يا أنوسة...أنت زمان كنت بتحبى تبقى من الأوائل و لا أيه.....هاهاه....مبرسى أوى على كلامك الجميل...رفعتى من معنوياتى...كنت فين ساعة الانترفيو الأولانى...يالا تعوضيها فى التانى...

Rosie يقول...

عاشق الجنة
أهلا بك فى المدونة...أنا على فكرة ماكنش فى دماغى يتطلع طويل كده بس أعمل أيه الانترفيو كان طويل فالموضوع طول مى...عايزة أقولك بقى أنى أتأثرت أوى بحكاية استفدت منك دى..أصلها حاجة حلوة أوى أنك تحس أنك شخصية مفيدة...و إن شاء الله هازور مدونتك..........تحياتى

Rosie يقول...

دموع القمر
أنا و لا حباها و لا حاجة ...أنا بس كنت عايزة أحط حاجة فى السى فى بدل ما هو أبيض يا ورد كده..ما علينا ..ربنا يسهل و أشوف تصريفة تانية من غير انترفيو...و أنا اتعلمت جامد...و ده الخلاصة إذا أردت أن تحافظ على أعصابك فابتعد عن الانرفيوهات...منورة المدونة...و شكرا على التعليق..

Rosie يقول...

لا تشتاق
عندك حق..هو فعلا وصف غلس هو الوصف الأنسب..و بصراحة أنا بحاول أبعد عن الانترفيوهات على قد ما اقدر..عشان أنسى شوية اللى اتعمل فيه..و استعد لاترفيوهات الشغل على الأقل هاخد فيها فلوس..بدل ما أنا طلع عينى عشان أدخل فى حاجة هادفع فيها فلوس....شكرااااااا لوجودك

Rosie يقول...

زهور الأمل..
الله يسلمك...يعييييييييينى يا بنتى...شكلك شوفتى الويل ...واضح أن شعب مصر كله اتعذب فى الموضوع ده...بس إن شاء الله يكون ربنا تاب عليك من الانترفيوهات الرخمة دة......شكرا للتعليق..

Rosie يقول...

المسلم الصغير
أول انترفيو و أرخم انترفيو...آه و اتضلمت عليه و برده معجبتش ..يالا..ناس غريبة..شكرا للتعليق..

Rosie يقول...

Micheal
أهلا أهلا...كنت مستنية ردك فى الموضوع ده بالذات...لا..لا مش هاقطع عليك..ده هو انترفيو واحد يتيم...و ميرسى على اللينك..أنا قريته..وفعلا فى أفكار مفيدة بسس المشكلة أنه معمول للمتخرجين..عابزاك تعمل بوست تانى للمساكين اللى لسه فى الكليات..

قلم رصاص يقول...

السلام عليكم

اولا أبدى اعجابي بالمدونة بتاعة حضرتك

ثانيا عاوز اعرف هتديني كام عشان دي اول زيارة للمدونة ههههههههه

ثالثا زعلان جدا ان اول زيارة للمدونة يكون البوست طويل اوي كده .. وكأنه من قوم عاد هههههههههه

اتمنى لك التوفيق ومبروك اول انترفيو

دمتي على خير

والسلام عليكم

ضحكات الحياة يقول...

السلام عليكم

منون أخبارك ايه يا ستي و أخبار الكلية ايه ؟

ايه يا عم الانترفيوهات الجامده دي بس فعلا في أسئلة عبيطه قوي و فعلا المشكله انه من عبط الأسئلة بيبقي صعب أنك تجاوب عليها مش عارف

ربنا يوفقك ان شاء الله في الانترفيوهات الجاية و أبقي خديني معاكي اتفرج
ههههههههههههههههههههه

ضحكات الحياة يقول...

ما تنسنيش

انا موجود اهو و قاعد مستنيكي

يلا يلا يلا

و بعدين ده طالب اللي عامل الانترفيو امال لو دكتور هيعمل ايه

هيقولك جربي المشنقة دي شغاله ولا لأ ؟
ههههههههههههه
بعد الشر عليكي طبعا

Rosie يقول...

قلم رصاص
أهلا بك فى المدونة..هديك شوية ورد ..أيه رأيك..أيه الناس المادية دى...و معلش على أن البوست طويل بس جت معايا كده و عشان الانترفيو كان طويييل زى ما قلت...شكرا لتعليقك و أتمنى تتكرر الزيارة...

Rosie يقول...

ضحكات الحياة
فينك و أيه الغيبة الطويلة دى...هى هندسة بتعمل كده فى الناس..أخت صيدلة بالظبط...شوفت أنا بيجرالى أيه...و مش عارفة لو دكتور كان عمل أيه صحيح و بعدين أيه ده هتيجى تتفرج..هو ماتش كورة..و لا أقول أنا أخليه ماتش كوره فعلا و ألم الناس و أعجبهم يشجعونى عشان يبوظ أعصاب الفريق المنافس أصدى اللى بيعملى انترفيو...هاهاهاها..شكل الانترفيو قصر على عقلى........شكرا للتعليق و منور المدونة....

ضحكات الحياة يقول...

ده بنورك

و بعدين انا هاجي اتفرج و اشجع و كل حاجة

و بعدين اهم حاجة الروح الرياضية

هنعملك مظاهرة عند باب الاستاد قصدي الانترفيو هههههههههههههه

و بعدين هندسه معملتش انفلونزا الخنازير هي اللي عملت الدكاتره مسروعييييييييييييين عايزين يخلصوا على العيد مش عارف هو سلق بيض


يلا ام هند ان انا اطمنت عليكي

يلا هتلاقيني بيجي علي طول هنا

سلاموزات

الحــ ــزين يقول...

الحــ ــزين
بجد موضوع جميل..وبجد دمك زى العسل
دومتى بكل خير

شاب فقرى يقول...

دايما فى اول زيارة بحاول اكون هادى و رد منطقى وعاقل

لكن دلوقتى

بصراحة

ربنا يعينك

بس لئيم اوى الشاب اللى كان بيعمل معاكى الانترفيو دا

الله يقويكى على الانترفيوهات اللى بجد

تحياتى

ولنا عودة ومتابعين بعون الله

شاب فقرى

Rosie يقول...

ضحكات الحياة..
على رأيك هى انفلونزا الخنازير..هى السبب فى كل اللى احنا فيه..جننت الناس و الدكاترة والمعيدين و كل الناس...و سلق بيض أيه..ده سلق البيض بيتعمل بتأنى أكتر من كده...
شكرا لوجودك فى المدونة..

Rosie يقول...

الحزين
بجد شكرا على كل اللى قلته..

Rosie يقول...

شاب فقرى
عجبتنى قوى الكلام اللى بدات بيه..
ربنا يقوينا كلنا..و شرفت المدونة..و أتمنى تكرر الزيارة..

شاب فقرى يقول...

يا نهار أبيض


أنا أكيد إمبارح كنت نايم على روحى عشان اكتب التعليق دا

بجد بجد تعليق سطحى والسطور ملهاش علاقة ببعض ولا تحس كأن حد عاقل بيكتب

نيجى بقى للتعليقات اللى بجد

لازم تحضرى اكتر من انترفيو وتحاولى تفهمى نوعية أدمغة البشر وإزاى تقدرى تاكلى دماغ اللى قدامك بكلمتين وتبقى قد المكانة اللى إنتى فيها
بحسث إنك تكونى شخص قوى يقدر ينزل سوق العمل فى أى وقت و أى زمان

أكيد دا تيست صغير

لكن صدقينى اول انترفيو حقيقى هيحسسك بإحساس أعظم من دا

فإحضرى أى إنترفيو حتى لو هتعملى حاجة بالموديل اللى بتتقدمى ليه

إحضرى الانترفيو وإتمرنى مش أكتر

تحياتى

ولنا عودة

شاب فقرى

micheal يقول...

مستني بوست جديد مش شرط إنترفيو
:)

Rosie يقول...

شاب فقرى
شكرا على التعليق مرة تانية..و متبقاش قاسى أوى على نفسك..التعليق الأول كان كويس برده..و شكرا على النصيحة..

Rosie يقول...

Micheal
إن شاء الله...بس الكلية مش مديانى فرصة أتنفس..

اقصوصه يقول...

هههههههههه

تعيشي وتجربي :)

ليس فقيرا من يحب يقول...

السلام عليكم

ازيك يا حبيبتى

وليه غايبه كده

هههههههههههههههه تعيشى وتعملى

انترفيوهات بس مش مع حد غلس بالشكل ده

ربنا يوفقك يارب

------ يقول...

ازيك يااحلى منة

وحشانى جدا على فكرة

قولت اطمن عليكى بس

(دموع القمر )

Rosie يقول...

اقصوصة
شكرا منورة المدونة...

Rosie يقول...

parkkamaramu
Thanks for the visit....& u are welcomed at any time..

Rosie يقول...

ليس فقيرا من يحب
معلش أنا غايبة عشان الامتحانات..الدنيا بتمكر عليا امتحانات...لما أشم نفسى شوية منها هارجع أكتب تانى إن شاء الله

Rosie يقول...

همسات على ضوء القمر
شكرا على السؤال ..أنا كويسة الحمد لله ..لسه عايشة بس وسط عدد رهيب من الامتحانات..

ضحكات الحياة يقول...

يا منه رحتي فين

انتي فين يا جهاااااااااااااااد ؟

قصدي يا منه
ههههههههههههههههه

micheal يقول...

ألووووووووووووووو يا إنترفيوهات
:)

ضحكات الحياة يقول...

1- settings
2- comments
3- comment form messaga

المسلم الصغير يقول...

السلام عليكم ورحمة الله...
أزيك يا جميل بجد وحشاني قوييييييييييي
فينك يا بنتي من زمان أة هوبعد الأنترفيو حصلك اية
انا حبيت اطمن عليكي لانك وحشاني خالص
وكل سنة وانتي طيبة بمناسبة العيد ويارب يكون عيد سعيد عليكي وعلى الأمة الأسلامية
دومتي بخير

♥نبع الغرام♥♪≈ يقول...

كووووووووول سنة وانتى طيوبة حبيبتى

فينك كده غايبة

ربنا يطمنى عليكى لانى قلقانه بجد

ربنا يسعدك يارب
وعيد سعيد عليكى وعلى اسرتك والامة الاسلامية
تحياتى

micheal يقول...

كل سنة وأنتي طيبة

Rosie يقول...

ضحكات الحياة
أنا هنا أهو يا عمرو....موجودة و الله..بسمالايش نفس أكتب خالص...شكرا على الطريقة...ربنا يخليك لمصر..

Rosie يقول...

Micheal
و أنت طيب و شكرا لأنك دايما بتعيد عليا فى كل عيد.......

Rosie يقول...

المسلم الصغير
ماتخفش أنا لسه عايشة بعد الانترفيو بس مضربة شوية عن الكتابة...شكرااااااااااااااااااااا جدا لكل كلمة كتبتها..

Rosie يقول...

قيس بن المللوح
شكرا و أنت طيب.. و بخيييييير

Rosie يقول...

أنوسة
Don`t worry..متقلقيش..كان نفسى اكتبها بلغة تالتة بس الذاكرة مش مساعدة خالص الأيام دى.....أنا كويسة و الحمدلله...بجد شكرا شكرا على سؤالك أنت و كل المدونين الجامدين دول..

السبت، 17 أكتوبر 2009

أول انترفيو فى حياتى









أول حاجة انا عايزة أكتب اعتذار كبير بالخط العريض لأنى كنت بعيد شوية الأيام اللى فاتت..بس تقريبا دى حالة طبيعية مع دخول الكلية...أول ماتدخل تحس أنك اتشليت من الصدمة..فاطبعا ماكنتش قادرة أكتب حاجة خالص...و بعد مرور أسبوعين من البهدلة و الطلوع و النزول و الخناق فى المواصلات و متعة و قفة المعامل و حر المعامل و خنقة المعامل قررت أنى أكتب تانى ...و بما إن مفيش إلهام خاااالص خاالص فأنا قررت أحكيلكوا عن حكاية لطيفة ...حكاية انترفيو يارب تعجبكو...
كان يا مكان فى سالف العصر و الأوان لما دخلت كلية صيدلة قعدت أدور على حاجة ترفيهية فيها و أدور و أدور...و طبعا ما لقيتش...كان فى حاجة كده تعتبر من نوع من أنواع النشاط...أيه ده شايفة الناس هتفهمنى غلط...نشاط علمى طبعا..بس فيه شوية حركة بتخرج بره الكلية و تروح شركات و صيدليات و كده يعنى ..فكان يعتبر حاجة فظيعة!!..قالولى قدمى قلت ماشى..بس راحة أقدم أنا فى أمانة الله ألاقيلكو أيه...النشاط بيدٌخل بانترفيو...يا نهار أسود...و طبعا قلتلهم لأ أنا مش وش انترفيوهات خالص...بس الزن على الودان وحش...قاعدوا يقنعونى لغاية لما قررت أدخل العملية الفدائية دى"النترفيو"..
و فعلا مرت الأيام و جه اليوم الموعود...طبعا كان يوم معامل.."يعنى يوم البهدلة العالمى" و اليوم ده أنا بابقى بحلم بالبيت من و انا لسه فيه...المهم اضطريت آسفة أنى أقعد بعد المعامل عشان الانترفيو..و طبعا أنا قبل ما أدخل كنت عاملة بحث شامل عن الأسئلة الى بيسئلوها...برده الاحتياط واجب...
قبل ما أقول لكم عن اللى اتقال فى الانترفيو لازم تعرفوا إن اللى كان بيعملهولى كان طالب زى...آه والله..شفتوا الجمال..كلية آخر تطور...أصل احنا الطلبة أسرة مع بعضينا-على رأى الفيلم- منحبش ندخل حد غريب بينا..

وبدأ الانترفيو
أول حاجة قالى عرفى نفسك..و طبعا أنا محدش قالى السؤال ده قبل كده..فابدأت أقوله اسمى و سنى و ساكنة فين
فاعتقد أنه بدأ يحس أنى عاملة زى الخاطبة اللى بتقول مواصفات العروسة فماسبنيش أكمل و قالى أنت مش شايفة إن شغلانة مندوب الأدوية مش كويسة للبنات؟...أنا قلت له لأ طبعا كويسة..بس للأسف مردتش أكتر من كده و مش عارفة ليه...يمكن لأنى حسيته بيسأل سؤال عبيط....عامة أنا الاحساس ده كان عندى طول الانترفيو....أصل لما كلية يبقى 80% فيها بنات يبقى ميبفعش خالص تقول الشغلانة دى تنفع و لا متنفعش..غير إن البنات مش ناقصين أيد و لا رجل..إذن فسؤاله كان بالنسبة لى منتهى العبط....
و بعدين رجع لى تانى و قالى قولى لى 3 مميزات فيكى و 3 عيوب..............أوباااااا...أهو ده اللى أنا كنت خايفة منه...طبعا أنا الناس قالولى إن السؤال ده أساسى فى كل انترفيو فأنا حاولت أحضر الاجابة و أسأل اللى يعرفونى و كده...و طبعا قعدت أحاول أقنعه إن المفروض الناس هى اللى ترد على السؤال ده مش أنا...بس لا حياة لمن تنادى...يقولى أصل أنا لما أعرف عيوبى هاصلحها...يا سلااااام ماكنش حد غلب...قلت له طب أيه عيوبك أنت قال لى هاقلك بعد الانترفيو..أيه هاقلك بعد الانترفيو دى...ماتقلها بصراحة...أنا مش عارف عادى يعنى..المهم بعد فشلى من الهروب من السؤال اضطريت آسفة إن أجاوب قلت له
المميزات :
1-helpful 2-responsible 3-مش فاكرة قلت أيه بصراحة
العيوب بأه:
1-عنيدة 2-عالطول عايزة أكتر...قالى ده مش عيب دى ميزة...طب بذمتك ده كلام يعنى أنا يطلع عينى عقبال ما أفكر هافوله أيه ...و بعدين يقولى ده ميزة ...طب أجبله عيب منين دلوقتى...و معرفتش أقول أيه فى التالت...هو فى عيوب طبعا بس ما ينفعش أقولها...يعنى ممكن أقول إنى بازعل بسرعة...هيقول لى طيب مع السلامة فوتى علينا بكرة...لأن دى أول صفة المفروض ماتبقاش موجودة...
يعنى هو مثلا كان بيحاول يستفزتى طول النترفيو عشان يشوف هتأثر و لا لأ...بس على ميين...أبقى بجاوب..يقاطعنى و يسأل سؤال تانى و ميبوصليش أصلا و أنا بتكلم و بعدين يقلى أنت اتضايقتى و يا ويلك لو قلتى آه...و طبعا ده بيتعمل فى كل الناس عشان يشوفوا مين اللى هيصمد و مين اللى هيخلع على أساس إن الدكاترة هتلر و لا هلاكو...ماعلينا....
نرجع للانترفيو.....الجزء المهم جدا جدا و الشيق و المسلى...قياس الذكاء..أن أن آه....أول حاجة قالى قولى لى 10 استخدامات للمسمار غير إن أننا بنثيت الحاجات بيه...فى 40 ثانية...طبعا مش قادرة أقولكم احساسى كان أيه...بالظبط زى مايكون حد سألك اسمك أيه بالصينى...تلاقى نفسك وقفت و بلمت بالرغم إن اسمك واحد بكل اللغات...قلت له بنحفر بيه ونعمل بيه
&art work و كام حاجة عبيطة كده تانية بس طبعا ماكملتش 10 و لا حتى 5
و طبعا أول ما خرجت من باب الكلية افتكرت اكتر من 10 كمان إن احنا ممكن نعور بيه و ممكن بما إنه حديد نستخدمه كل استخدمات الحديد...نجربه مع مغنطيس .....و نفهم منه عملية الصدأ...و أى كلام من الكلام الفارغ ده...لكن ساعتها مخى وقف....
ندخل على السؤال اللى وراه و هو لو مليتى بانيو على الآخر أيه أسرع طريقة تفضيه بيها...بالجردل و الشفشق و لا المعلقة....طبعا أنا قاعدت أسأله مليت أيه؟...يقولى بانيو...اقوله لأ تانى مليت أيه....يقولى بانيو...و بعدين قررت أصدق إنى اللى سمعاه ده صح....قلت له الجردل و أنا مقتنعة أنه غلط لأن مش معقول السؤال بيقى بالسهولة دى بس هو اللى ادالى 3 اختيارات بس............و طبعا كما توقعت طلعت اجابة غلك لأن المفروض أقول شيل السداداة....تهريج صح؟؟
و بعبدين ورالى سؤال بالأرقام بس الحمد لله أنا كنت عارفاه فقلت له أنى شوفته قبل كده فبدل ما يقولى برافو على أمانتك قالى أنت كنت هتجاوبى و لا أيه....أيه الناس دى....
و بعدين المرحلة المهمة ...مرحلة الاقناع و البيع...قالى بيعى لى التليفون ده_قصده تليفونه_و بسرعة كده رص لى اللميزات و طبعا ملحقتش أحفظ حاجة فاقلتله هابعلك تليفونى...و الصراحة هو وافق...أصل هابعلوا تليفونه السامسونج ده ازاى و أنا عمرى ما شيلت تليفون سامسونج........بس قعدت أحكيله على تليفونى قالى أنت مش شايفة أن نوكيا انتشرت و إنى الأحسن أجيب تليفون مش منتشر...طبعا الرد المناسب كنت إنى أقوله"نعم يا بابا...روح ألعب بعيد"...[س طبعا أنا فضلت ذوق لآخر لحظة و قلت له لأ طبعا لأن الأحسن إنك تجيب تليفون قطع غياره موجودة و منتشرة عشان متدوخش عليه و غير أن سامسونج مش unique
و لا حاجة ...و موجود برده..فى انترفيوهات تانية قالوا للناس بيعى لى نفسك...بجد الناس دى اتجننت...فالحمد لله أنها جت على قد موبايلات...و فى انترفيوهات تانية كانوا بقولوا اقنعينى بالتدخين..طبعا أنا لما دخلت الانترفيو قلت له أنا سمعت السؤال ده قبل كده...و برده مقدرش الصراحة دى.........
فى الآخر بقى قالى تدى لنفسك كام قلت له 90%...قالى أنت مغرورة..قلت له لأ........بذمتكم 90 % كتير دى مدخلش صيدلةحتى...نسيت أقولكم أنه فى أسئلة الذكاء سأل سؤال كمان و الحمد لله جوبته صح و كان مستغرب أوى و قعد يقولى أنت سمعتيه قبل كده...بنى آدم غريب فعلا...ليه مايبفكرش أن مخى يكون عود نفسه على نوعية أسئلة الغباء دى...عفوا الذكاء و بدأ يجاوب صح....المهم السؤال هو ازاى الواحد يغرق فى شبر مياه؟؟؟؟فانا قلت له يجيب كوباية و يلزقها على وشه بحيس أنه ميعرفش يتنفس و بكد يكون غرق فى شبر مياه...شوفتوا العبقرية.............
آخر حاجة..المرة د بجد...الولد عاوز يورينى أنه لغات و بتاع فقال لى....

Do u think I am gonna accept u?
و بيكلم بالامريكانى فاكر نفسه توم كروز...ما علينا....قلتله طبعا yes
و كان ناقص أقوله و رجلك فوق رقبتك...و طبعا مادخلتش النشاط ده..غير لأنى لبخت جامد فى الأسئلة و خاصة بتاعة الغباء د كمان لأنى ماكنتش فاهمه الموضوع عن أيه أوى فعكيت شوية...فهو فهم إنى مش واثقة من نفسى لما كنت بقله على حاجات مش هينفع أعملها...لأنى كنت فاكرة كبراة الكلية هم اللى بيعملوها...و بعيدن بعد ما خلصت الانترفيو اكتشفت أنها حاجات عبيطة و كل الطلبه هما اللى بيعملوها...................أيه رأيكم بقى..................و تفتكروا أدخلوه مرة تانية و لا أنفض.........يارب ما كنش طولت عليكم....

هناك 53 تعليقًا:

♥نبع الغرام♥♪≈ يقول...

مممممممممممممممم

ونقول اول تعليق

انا هنا

♥نبع الغرام♥♪≈ يقول...

حمد الله على السلامه

وحشتينى قووى
ياريت مش تغيبى تانى عننا

♥نبع الغرام♥♪≈ يقول...

ارو اقرء وارجع

فاصل صغنون ثم نواصل

♥نبع الغرام♥♪≈ يقول...

هههههههههههه

ايه يا روزى الحاجات الجامده دى
تعرفى بجد انك دمك زى العسل

وحبيتك قووى اكتر من الاول

ههههههههههههه
فيكى خفة دم رهيبه
ربنا يكرمك خير يارب ويوفقك
بس بجد مسليه
وادخلى تانى وسيبها على اللى خلقها

دمتى فى حفظ الرحمن

♥نبع الغرام♥♪≈ يقول...

لو احتجتينى فى المقابله التانيه انا هنا ماشى
اعرف اوجهم كويس

هههههههههههههههههه

عاشق الجنة من الإخوان صلى على النبى يقول...

رغم إن الموضوع طويل شويتين بس بصراحة
أنا شخصياً استفدت جداً لما قريته
وكمان انت شديت علي الولد ده قوي بالراحة شوية الرحمة حلوة ولا ايه
موضوع جميل جزاكم الله خيراً
في انتظار تشريفكم بالزيارة لمدونتي
صلي علي النبي

------ يقول...

وسسسسسسسسسسسسسسسسععععععععععع

والتعليييييييييييييق التالت

ازيك يامنة

وحشااانى والله

------ يقول...

هههههه

وربنا انتى زى العسل والله

ايه دا

بس اقول لو انت حاباها ادخلى تانى

وجربى حظك يمكن تصيب

بس اهم حاجة تكونى اتعلمتى من المرة الاولى

بس ياخوفى ليكونوا حاطوكى فى البلاك ليس بس

لا تـــشـــتــــاق يقول...

انتر فيو غلس اوى من شخص اغلس
ايه ده
عموما حمدلله على السلامه ونصيحه بلاش انتر فيوهات دلوقتى لحد ماالمدارك تتوسع في الغباء عشان تقدري توصلي للناس
هههههههههه
حاجه غبيه والله

زهور الامل يقول...

ههههههههههه اول انترفيو واتعقدتي كدة

ده انا المفروض يدوني جايزة نوبل على الانترفيوهات الفاشلة اللي عملتها في حياتي
ده انا عملت بعدد شعر راسي انترفيوهات

حسسوني اني اغبى مخلوقة في العالم واني متعلمتش اصلا
تعيشي وتعملى انترفيوهات
بس تكون انترفيوهات ناجحة يا قمر

اه من الحق
حمدالله على السلامة وعودا حميدا

المسلم الصغير يقول...

السلام عليكم ...
أزيك يا جميل ويا ترى عاملة أية بعد اول انترفيو حاسة ان انتي اتحطيتي في موفق جديد ومع نفس الوقت خطوة جديدة
هي بس علشان اول مرة فكنتى مرتبكة شوية بس أنتي مسبتهوش في حالة واتلمضتي معاه
ياريت تكوني أستفتي منها واوعي تخافي جربي مرة واتنين وتلاتة كمان ومتيأسيش
دومتي بخير

micheal يقول...

ههههههههههههههههههههههههههههههههههههههههههههههههههه
نترفيو
ههههههههههههههههههههههههه
انتي حتقطعي عليا ولا ايه
بخصوص الأسئلة اللي اتساليتها
لازم تشوفي البوست ده عشان تعرفي أننا ناس خبرة
http://strugglingmichealitoo.blogspot.com/2009/05/blog-post_09.html
بالتوفيق وبإذن الله يبقى حظك أحسن مني
:))
تحياتي

Rosie يقول...

بجد تعليقاتكم أكتر من رائعة...فرحتونى و ضحكتونى من قلبى...أرد بقى على واحد واحد...

Rosie يقول...

عاشقة الأحزان
دايما فى الأول يا أنوسة...أنت زمان كنت بتحبى تبقى من الأوائل و لا أيه.....هاهاه....مبرسى أوى على كلامك الجميل...رفعتى من معنوياتى...كنت فين ساعة الانترفيو الأولانى...يالا تعوضيها فى التانى...

Rosie يقول...

عاشق الجنة
أهلا بك فى المدونة...أنا على فكرة ماكنش فى دماغى يتطلع طويل كده بس أعمل أيه الانترفيو كان طويل فالموضوع طول مى...عايزة أقولك بقى أنى أتأثرت أوى بحكاية استفدت منك دى..أصلها حاجة حلوة أوى أنك تحس أنك شخصية مفيدة...و إن شاء الله هازور مدونتك..........تحياتى

Rosie يقول...

دموع القمر
أنا و لا حباها و لا حاجة ...أنا بس كنت عايزة أحط حاجة فى السى فى بدل ما هو أبيض يا ورد كده..ما علينا ..ربنا يسهل و أشوف تصريفة تانية من غير انترفيو...و أنا اتعلمت جامد...و ده الخلاصة إذا أردت أن تحافظ على أعصابك فابتعد عن الانرفيوهات...منورة المدونة...و شكرا على التعليق..

Rosie يقول...

لا تشتاق
عندك حق..هو فعلا وصف غلس هو الوصف الأنسب..و بصراحة أنا بحاول أبعد عن الانترفيوهات على قد ما اقدر..عشان أنسى شوية اللى اتعمل فيه..و استعد لاترفيوهات الشغل على الأقل هاخد فيها فلوس..بدل ما أنا طلع عينى عشان أدخل فى حاجة هادفع فيها فلوس....شكرااااااا لوجودك

Rosie يقول...

زهور الأمل..
الله يسلمك...يعييييييييينى يا بنتى...شكلك شوفتى الويل ...واضح أن شعب مصر كله اتعذب فى الموضوع ده...بس إن شاء الله يكون ربنا تاب عليك من الانترفيوهات الرخمة دة......شكرا للتعليق..

Rosie يقول...

المسلم الصغير
أول انترفيو و أرخم انترفيو...آه و اتضلمت عليه و برده معجبتش ..يالا..ناس غريبة..شكرا للتعليق..

Rosie يقول...

Micheal
أهلا أهلا...كنت مستنية ردك فى الموضوع ده بالذات...لا..لا مش هاقطع عليك..ده هو انترفيو واحد يتيم...و ميرسى على اللينك..أنا قريته..وفعلا فى أفكار مفيدة بسس المشكلة أنه معمول للمتخرجين..عابزاك تعمل بوست تانى للمساكين اللى لسه فى الكليات..

قلم رصاص يقول...

السلام عليكم

اولا أبدى اعجابي بالمدونة بتاعة حضرتك

ثانيا عاوز اعرف هتديني كام عشان دي اول زيارة للمدونة ههههههههه

ثالثا زعلان جدا ان اول زيارة للمدونة يكون البوست طويل اوي كده .. وكأنه من قوم عاد هههههههههه

اتمنى لك التوفيق ومبروك اول انترفيو

دمتي على خير

والسلام عليكم

ضحكات الحياة يقول...

السلام عليكم

منون أخبارك ايه يا ستي و أخبار الكلية ايه ؟

ايه يا عم الانترفيوهات الجامده دي بس فعلا في أسئلة عبيطه قوي و فعلا المشكله انه من عبط الأسئلة بيبقي صعب أنك تجاوب عليها مش عارف

ربنا يوفقك ان شاء الله في الانترفيوهات الجاية و أبقي خديني معاكي اتفرج
ههههههههههههههههههههه

ضحكات الحياة يقول...

ما تنسنيش

انا موجود اهو و قاعد مستنيكي

يلا يلا يلا

و بعدين ده طالب اللي عامل الانترفيو امال لو دكتور هيعمل ايه

هيقولك جربي المشنقة دي شغاله ولا لأ ؟
ههههههههههههه
بعد الشر عليكي طبعا

Rosie يقول...

قلم رصاص
أهلا بك فى المدونة..هديك شوية ورد ..أيه رأيك..أيه الناس المادية دى...و معلش على أن البوست طويل بس جت معايا كده و عشان الانترفيو كان طويييل زى ما قلت...شكرا لتعليقك و أتمنى تتكرر الزيارة...

Rosie يقول...

ضحكات الحياة
فينك و أيه الغيبة الطويلة دى...هى هندسة بتعمل كده فى الناس..أخت صيدلة بالظبط...شوفت أنا بيجرالى أيه...و مش عارفة لو دكتور كان عمل أيه صحيح و بعدين أيه ده هتيجى تتفرج..هو ماتش كورة..و لا أقول أنا أخليه ماتش كوره فعلا و ألم الناس و أعجبهم يشجعونى عشان يبوظ أعصاب الفريق المنافس أصدى اللى بيعملى انترفيو...هاهاهاها..شكل الانترفيو قصر على عقلى........شكرا للتعليق و منور المدونة....

ضحكات الحياة يقول...

ده بنورك

و بعدين انا هاجي اتفرج و اشجع و كل حاجة

و بعدين اهم حاجة الروح الرياضية

هنعملك مظاهرة عند باب الاستاد قصدي الانترفيو هههههههههههههه

و بعدين هندسه معملتش انفلونزا الخنازير هي اللي عملت الدكاتره مسروعييييييييييييين عايزين يخلصوا على العيد مش عارف هو سلق بيض


يلا ام هند ان انا اطمنت عليكي

يلا هتلاقيني بيجي علي طول هنا

سلاموزات

الحــ ــزين يقول...

الحــ ــزين
بجد موضوع جميل..وبجد دمك زى العسل
دومتى بكل خير

شاب فقرى يقول...

دايما فى اول زيارة بحاول اكون هادى و رد منطقى وعاقل

لكن دلوقتى

بصراحة

ربنا يعينك

بس لئيم اوى الشاب اللى كان بيعمل معاكى الانترفيو دا

الله يقويكى على الانترفيوهات اللى بجد

تحياتى

ولنا عودة ومتابعين بعون الله

شاب فقرى

Rosie يقول...

ضحكات الحياة..
على رأيك هى انفلونزا الخنازير..هى السبب فى كل اللى احنا فيه..جننت الناس و الدكاترة والمعيدين و كل الناس...و سلق بيض أيه..ده سلق البيض بيتعمل بتأنى أكتر من كده...
شكرا لوجودك فى المدونة..

Rosie يقول...

الحزين
بجد شكرا على كل اللى قلته..

Rosie يقول...

شاب فقرى
عجبتنى قوى الكلام اللى بدات بيه..
ربنا يقوينا كلنا..و شرفت المدونة..و أتمنى تكرر الزيارة..

شاب فقرى يقول...

يا نهار أبيض


أنا أكيد إمبارح كنت نايم على روحى عشان اكتب التعليق دا

بجد بجد تعليق سطحى والسطور ملهاش علاقة ببعض ولا تحس كأن حد عاقل بيكتب

نيجى بقى للتعليقات اللى بجد

لازم تحضرى اكتر من انترفيو وتحاولى تفهمى نوعية أدمغة البشر وإزاى تقدرى تاكلى دماغ اللى قدامك بكلمتين وتبقى قد المكانة اللى إنتى فيها
بحسث إنك تكونى شخص قوى يقدر ينزل سوق العمل فى أى وقت و أى زمان

أكيد دا تيست صغير

لكن صدقينى اول انترفيو حقيقى هيحسسك بإحساس أعظم من دا

فإحضرى أى إنترفيو حتى لو هتعملى حاجة بالموديل اللى بتتقدمى ليه

إحضرى الانترفيو وإتمرنى مش أكتر

تحياتى

ولنا عودة

شاب فقرى

micheal يقول...

مستني بوست جديد مش شرط إنترفيو
:)

Rosie يقول...

شاب فقرى
شكرا على التعليق مرة تانية..و متبقاش قاسى أوى على نفسك..التعليق الأول كان كويس برده..و شكرا على النصيحة..

Rosie يقول...

Micheal
إن شاء الله...بس الكلية مش مديانى فرصة أتنفس..

اقصوصه يقول...

هههههههههه

تعيشي وتجربي :)

ليس فقيرا من يحب يقول...

السلام عليكم

ازيك يا حبيبتى

وليه غايبه كده

هههههههههههههههه تعيشى وتعملى

انترفيوهات بس مش مع حد غلس بالشكل ده

ربنا يوفقك يارب

------ يقول...

ازيك يااحلى منة

وحشانى جدا على فكرة

قولت اطمن عليكى بس

(دموع القمر )

Rosie يقول...

اقصوصة
شكرا منورة المدونة...

Rosie يقول...

parkkamaramu
Thanks for the visit....& u are welcomed at any time..

Rosie يقول...

ليس فقيرا من يحب
معلش أنا غايبة عشان الامتحانات..الدنيا بتمكر عليا امتحانات...لما أشم نفسى شوية منها هارجع أكتب تانى إن شاء الله

Rosie يقول...

همسات على ضوء القمر
شكرا على السؤال ..أنا كويسة الحمد لله ..لسه عايشة بس وسط عدد رهيب من الامتحانات..

ضحكات الحياة يقول...

يا منه رحتي فين

انتي فين يا جهاااااااااااااااد ؟

قصدي يا منه
ههههههههههههههههه

micheal يقول...

ألووووووووووووووو يا إنترفيوهات
:)

ضحكات الحياة يقول...

1- settings
2- comments
3- comment form messaga

المسلم الصغير يقول...

السلام عليكم ورحمة الله...
أزيك يا جميل بجد وحشاني قوييييييييييي
فينك يا بنتي من زمان أة هوبعد الأنترفيو حصلك اية
انا حبيت اطمن عليكي لانك وحشاني خالص
وكل سنة وانتي طيبة بمناسبة العيد ويارب يكون عيد سعيد عليكي وعلى الأمة الأسلامية
دومتي بخير

♥نبع الغرام♥♪≈ يقول...

كووووووووول سنة وانتى طيوبة حبيبتى

فينك كده غايبة

ربنا يطمنى عليكى لانى قلقانه بجد

ربنا يسعدك يارب
وعيد سعيد عليكى وعلى اسرتك والامة الاسلامية
تحياتى

micheal يقول...

كل سنة وأنتي طيبة

Rosie يقول...

ضحكات الحياة
أنا هنا أهو يا عمرو....موجودة و الله..بسمالايش نفس أكتب خالص...شكرا على الطريقة...ربنا يخليك لمصر..

Rosie يقول...

Micheal
و أنت طيب و شكرا لأنك دايما بتعيد عليا فى كل عيد.......

Rosie يقول...

المسلم الصغير
ماتخفش أنا لسه عايشة بعد الانترفيو بس مضربة شوية عن الكتابة...شكرااااااااااااااااااااا جدا لكل كلمة كتبتها..

Rosie يقول...

قيس بن المللوح
شكرا و أنت طيب.. و بخيييييير

Rosie يقول...

أنوسة
Don`t worry..متقلقيش..كان نفسى اكتبها بلغة تالتة بس الذاكرة مش مساعدة خالص الأيام دى.....أنا كويسة و الحمدلله...بجد شكرا شكرا على سؤالك أنت و كل المدونين الجامدين دول..